اسكريبت للكاتبة رنا محمد
_ها يعني نقول ضهرنا اتحميٰ خلاص؟
_قولي بسرعه مفيش وقت للتفسير خطيبك بقا ظابط
"كنت بكلمه في التيليفون وكانت اخر سنه له في كليه الشرطه وعن فرحتي بيه مكنتش موصوفه بجد وانه اخيرًا حقق حلمه وبقا ظابط رسميًا وهبقا حرم الظبوطه.."
_اذيك يا سيف يا ابني الف مبروك
_الله ييارك فيكِ يا حبيبتي اومال اروي فين؟
_انا جيت يا قلب اروي
_ما تتلمي يا قلب امك انا واقفه!
_لا مؤاخذه يا ماما اصلي فرحانه بيه
لقيت بابا داخل بيجري _في ايه يا واد يا سيف جايبني علي ملي وشي ليه؟
_مفيش اي حاجه خد نفسك بس
_قولي يا ابني انت خضيتني لما اتصلت وقولتلي انك جاي البيت عاوزني
_بص يا حاج دلوقتي انت عارف اني اتخرجت من كلية الشرطه وشويه وهشتغل واني خلصت الشقه وانتوا جهازكم خلص يعني نكتب الكتاب اخر الاسبوع و الفرح بعدها باسبوع
_انت بتقول ايه؟
_يا عمي والله افهمني انا كلامي صح
_ما انا عارفه انه صح بس مش بالسرعه دي
_والله بالسرعه دي واسرع كمان بس انت وافق
_امري لله مبروك يا حبايبي
_لوللوللولولولولولولي
"هو اسبوع بس اجمل اسبوع تعب مر عليا حرفيًا كنا بنعمل اللمسات الاخيره في الشقه اللي اتفرشت في يوم واحد من كل شئ فساتيني اللي نزلت وعملتهم بدلته اللي اخترناها سوا هو بصراحة كده مكنش في وقت منزلناش فيه سوا نجيب اي حاجه حتي لو صغيره وزي ما باتمني واكتر حبتين.."
"فرحي اللي هيتعمل في قاعه مفتوحه اغاني احنا اللي مختارينها بنفسنا كل حاجه من اختيارنا سوا حتي خزين البيت نزلنا سوا جبناه كان جاري ودلوقتي جار روحي وحبيب قلبي وكل ماليا..."
_ها جاهزه يا عروسه؟
_انا متوتره اوي ومش مصدقه ان اليوم اللي بتمناه وبحلم بيه طول عمري جه
"نزلت وعملنا الفيرست لوك واتصورنا وغنينا ورقصنا وفرحنا وسط الناس اللي بنحبهم وبيحبونا واليوم عدي بسلام والحمد لله.."
"بعد شهرين كان استلم سيف شغله في الشرطه وبقيت بشوفه بالصدفه في البيت انا مقدره انه شغله بس انا معدتش بقعد معاه ولا بشوفه ليه الشغل واخد وقته كله ولو اخد اجازه فهي بتكون كلها نوم علشان بيبقا تعبان طب وانا!! مش موجوده وبدأت هنا خناقاتنا تكتر.."
_هو انا فين في حياتك؟!
_انتِ حياتي كلها يا اروي
_لا انا مش موجوده في حياتك ولا في يوم يا سيف انت بقيت من الشغل اللي ساعات بتبات فيه للنوم ومبشوفش وشك ولا بتتكلم معايا ولا اي حاجه
_اعمل ايه يعني يا اروي؟
_متعملش يا حبيبي انا اللي هروح عند بابا
_اعقلي يا اروي واقعدي وهنحل مشاكلنا
_لا يا سيف انا ماشي
"مشيت وانا عارفه اني غلطانه وانه ملهوش ذنب في ده وده شغله بس انت زهقت روحت لبابا وطبعًا محدش كان في صفي واني غلطانه وان ده شغله وهو يعمل ايه يعني وكل الكلام ده وبالليل لقيت سيف جاي وصالحني وقالي انه هيحاول يفضيلي وقت في يومه نقعد فيه وكله بقا تمام وروحنا سوا.."
_عارف يا سفسف؟
_هششش يا ايه!
_سفسف
_ده ايه ده؟
_بدلعك يا حبيبي
_لا شكرا متدلعنيش تاني
_طب تمااام
_عاوزه ايه بقا؟
_لا نسيت خلاص
_الحمد لله علي نعمه الزهايمر يا شيخه
"مر شهرين كمان وهو بيحاول انه يعوضني وانا حسيت بده كان بييجي مش قادر من شغله ويقعد معايا شويه ونتكلم وناكل وبعدين ينام مكنش حوار يومي وانه بيعرف كل يوم يفضيلي وقت وكان ساعات بيبقا كل اسبوع لكن مشكور علي مجهوده اللي زي العسل ده..."
_منمتيش ليه؟
_خايفه
_من ايه؟!
_انت عاوز تبقا اول مأموريه ليك ومخافش؟
_ايه يا بت انتِ هو انا سوسن ده انا ظابط
_رينا يحفظك يارب ويرجعك ليا سالم غانم
_مينفعش سمير غانم
_اخفي من وشي يا سيف
"نزل وانا معرفتش انام خايفه وقلقانه ومش هتطمن غير لما يرجع فات وقت كبير بس بدأت اتعب ومعدتي توجعني فكرت علشان لسه منمتش وكده بس الوجع كان بيزيد كلمت ماما وجاتلي وودتني مستشفي وعرفت اني حامل في شهر ونص جه لبابا تليفون وطلع يتكلم بره ودخل بس دخل حزين قلبي وجعني من منظره..."
_مالك يا بابا؟
_مفيش يا اروي
_سيف كويس؟
_هو كويس جدًا دلوقتي
_يعني ايه؟
_ربنا استرد امانته البقاء لله
"وجع قلبي كان علي اللي في بطني وعلي حبيب قلبي اللي سابني ومعدتش هشوفه تاني طب و مين هيربي اللي جاي طب انا هحكي مع مين واقعد مع مين طب شقتنا اللي مختارين فيها كل حاجه وانت لسه متمتعتش بيها طب شغلك اللي فرحت بيه حلم عمرك اللي حققته هتسيب كل ده وتمشي من امتي وانت اناني كده!؟ طب عيني اللي هتوحشها ملمحك ودني اللي هيوحشها صوتك ده كله مفرقش معاك!!.."
"مشيت وسايبني ام واب للي في بطني اللي عرفت انها بنت هسميها فرح زي ما كنا متفقين عارف انت وحشتني بس وجودك في منامي كل يوم مفرحني ومطمني عارفه ان دعائي وكل الخير اللي بقدمه ليك بيوصلك رينا يرحمك ويغفرلك ويجمعني بيك يا جار القلب حتي الموت..."
༺༻༺༻༺༻༺༻༺༻༺༻༺༻༺༻
بقلم رنا محمد "حبة البُندق" 🌰🤎
رأيكم🦋🤎
♥♥♥
ردحذف♥♥♥
ردحذف♥♥♥
ردحذف♥♥♥♥
ردحذف